Польскія студэнты, якія сумяшчаюць працу з навучаннем, зарабляюць у сярэднім 3622,91 злотых нетта ў месяц, што ўсяго на 3% больш за бягучы мінімальны заробак у краіне.
Для параўнання, у мінулым годзе іх сярэдні даход складаў каля 3430 злотых у месяц, што на 5,6% менш.
Такія дадзеныя прадстаўлены ў даследаванні «Студэнт на працы», праведзеным у рамках Праграмы кар’еры Польскага савета бізнесу.
Сярэдні даход студэнтаў вагаецца ад 3 да 4 тысяч злотых. Такія сумы ўказаў кожны пяты апытаны. Пры гэтым 16% студэнтаў зарабляюць ад 2 да 3 тысяч злотых нетта, а 14% — ад 4 да 5 тысяч злотых.
У параўнанні з 2024 годам назіраецца значнае зніжэнне колькасці студэнтаў, якія зарабляюць ад 1000 да 2000 злотых (з 19,9% да 12,1%). У той жа час працэнт тых, хто атрымлівае ад 3 да 4 тысяч злотых, вырас з 15,3% да 19,8%. Таксама павялічылася колькасць студэнтаў, якія зарабляюць больш за 5 тысяч злотых нетта ў месяц — з прыкладна 15% да больш за 20%.
Найвышэйшыя даходы маюць студэнты ў Вроцлаве, дзе іх сярэдняя зарплата складае 4224,14 злотых. Найніжэйшыя даходы ў Кракаве, дзе студэнты зарабляюць у сярэднім 3107,14 злотых у месяц.
Варшава, нягледзячы на высокія зарплаты ў розных галінах, не з’яўляецца лідарам у гэтай катэгорыі: толькі 5,7% студэнтаў зарабляюць больш за 7000 злотых нетта.
У той жа час студэнты хацелі б зарабляць удвая больш. Іх жаданы сярэдні даход складае 7643,21 злотых нетта ў месяц. Паводле даследавання, праз год пасля пачатку кар’еры сярэдняя чаканая зарплата складае 9082,72 злотых у месяц, а праз 10 гадоў — 11 634,57 злотых.
У такіх гарадах, як Познань, Беласток і Шчэцін, большасць працуючых студэнтаў атрымліваюць менш за 1000 злотых.
Нагадаем, з 1 студзеня ў Польшчы мінімальная заработная плата павялічылася на 8,5% да 4666 злотых.
Крыніца: dlahandlu.pl, bankier.pl