На ліпень 2025 года ў Польшчы зарэгістравана 29 044 кампаніі, канчатковымі бенефіцыярамі якіх з’яўляюцца грамадзяне Украіны. З іх 13 014 былі заснаваныя пасля пачатку паўнамаштабнага ўварвання Расіі ва Украіну. Гэтыя даныя апублікаваў аналітычны сэрвіс Opendatabot на падставе інфармацыі з Польскага Нацыянальнага судовага рэестра (KRS).
За апошнія тры з паловай гады ўкраінцы заснавалі 6% усіх новых кампаній у Польшчы — з агульнай колькасці 208 тысяч новых прадпрыемстваў. Асабліва значны рост быў адзначаны ў 2022 годзе, калі было зарэгістравана 4780 украінскіх кампаній — амаль на траціну больш, чым у 2021 годзе.
Украінскія прадпрымальнікі часцей за ўсё выбіраюць таварыства з абмежаванай адказнасцю (Sp. z o.o.) — гэта самая папулярная форма вядзення бізнесу ў Польшчы. Такіх кампаній налічваецца 27 656, што складае 95% ад усіх украінскіх бізнесаў у краіне.
Актывізацыя назіраецца і ў некамерцыйным сектары. Пасля 2022 года ўкраінцы стварылі ў Польшчы 486 дабрачынных фондаў — у чатыры разы больш, чым да вайны.
Найбольшая колькасць украінскіх кампаній дзейнічае ў трох ваяводствах: Мазавецкім (у тым ліку Варшава) — 11 568 кампаній, Малапольскім (Кракаў і ваколіцы) — 3200 і Ніжнесілезскім (Уроцлаў і ваколіцы) — 3019.
Пераважная большасць гэтых кампаній — малыя прадпрыемствы. Больш за 75% кампаній, заснаваных пасля 2022 года, маюць статутны капітал менш за 10 тысяч злотых, і толькі 133 перавысілі парог у 500 тысяч злотых. Агульны капітал усіх украінскіх кампаній у Польшчы перавышае 7,34 мільярда злотых, з якіх 533 мільёны прыпадаюць на фірмы, заснаваныя пасля пачатку вайны. Хаця яны складаюць 45% ад усіх кампаній, іх доля ў капітале ў 12 разоў меншая за кампаніі, што дзейнічалі да вайны.
У 2024 годзе ўкраінскія прадпрымальнікі і работнікі пералічылі ў бюджэт Польшчы амаль 1,65 мільярда злотых падаткаў — як ад фізічных, так і ад юрыдычных асоб.
Паводле дадзеных кампаніі Gremi Personal, найбольш папулярныя галіны сярод украінскіх прадпрымальнікаў — будаўніцтва (23%), інфармацыйныя тэхналогіі і камунікацыя (18%), а таксама розныя віды паслуг (13%). У апошняй катэгорыі 82% кампаній аказваюць цырульніцкія і касметычныя паслугі.
Варта таксама адзначыць, што некаторыя ўкраінскія прадпрымальнікі актыўна развіваюць вядомыя нацыянальныя брэнды, паспяхова выводзячы іх на польскі рынак.
Крыніца: shoppingpl.com