На гэты момант чакалі ўсе аматары каляднай магіі! Гаворка, вядома ж, ідзе пра калядныя кірмашы, якія штогод ператвараюць польскія гарады ў зачараваныя месцы, напоўненыя агнямі, гукамі і водарамі. Менавіта тут водар пернікаў змешваецца з пахам глінтвейна, а маляўнічыя лаўкі вабяць рамеснымі вырабамі і каляднымі прысмакамі. Ад гістарычнай Рынкавай плошчы ў Кракаве, праз казачныя вулачкі Гданьска, да зіхоткага Вроцлава — прадстаўляем агляд самых прыгожых калядных кірмашоў Польшчы 2024 года.
Калядны кірмаш у Гданьску
Гданьскі кірмаш, які лічыцца адным з самых прыгожых у Еўропе, праходзіць на Вугальным рынку з 22 лістапада па 23 снежня 2024 года. Наведвальнікі могуць палюбавацца каляднымі агнямі, сустрэць талісман — лася Люську і пакатацца на катку. На лаўках можна знайсці кашубскія прысмакі, рамесныя вырабы і ручна распісаныя ёлачныя шары. Для дзяцей арганізаваны майстар-класы па стварэнні калядных упрыгажэнняў і сустрэчы са Святым Мікалаем.
Калядны кірмаш у Вроцлаве
З 29 лістапада 2024 года па 7 студзеня 2025 года галоўная плошча Вроцлава ператвараецца ў казачную сцэну, поўную калядных агнёў. Казачны лес прыцягвае дзяцей гісторыямі і атракцыёнамі, а шматлікія лаўкі прапануюць рамесныя вырабы і мясцовыя прысмакі, такія як баршч з вушкамі або гарачыя чуросы. У Доме Святога Мікалая дзеці могуць зрабіць фота з ім, а ў спецыяльнай зоне прапануюцца мастацкія майстар-класы.
Калядны кірмаш у Кракаве
Кракаўскі кірмаш, які праходзіць з 29 лістапада 2024 года па 1 студзеня 2025 года на Рынкавай плошчы, прыцягвае турыстаў з усяго свету. На шматлікіх лаўках можна знайсці традыцыйныя осціпкі, кракаўскія абаранкі і галiцыйскі гжанец (глінтвейн). Таксама праводзяцца суправаджальныя мерапрыемствы, такія як Шэсце шопак, Парад Санта-Клаўсаў і сумеснае спяванне калядак.
Віфлеем у Познані
Познанскі Віфлеем, адзін з найбуйнейшых кірмашоў у Польшчы, праходзіць на Плошчы Свабоды і Старым Рынку з 16 лістапада 2024 года па 6 студзеня 2025 года. Атракцыёны ўключаюць «Christmas Silent Disco», калядную зумбу, сумеснае спяванне калядак, канцэрты, шоу па разьбе лёду і сезонны каток. Для дзяцей падрыхтаваны казачныя домікі з рухомымі фігуркамі, цягнік з казкі і адкрыты кінатэатр з мультфільмамі.
Калядны кірмаш у Варшаве
Варшаўскі кірмаш праходзіць з 23 лістапада 2024 года па 6 студзеня 2025 года на Старым Горадзе. Гасцей чакае багаты выбар лаўкаў з рамеснымі вырабамі, мастацкімі і рамеснымі таварамі, а таксама кулінарнымі прысмакамі. Сярод іх — традыцыйныя польскія стравы, такія як пернікі, осціпкі з журавінамі і лустачкі хлеба са смальцам. Таксама ёсць міжнародныя прысмакі, такія як венгерскія калачы і літоўскія каўбасы.
Асобнай адметнасцю з’яўляецца каток на Рынкавай плошчы Старога горада вакол помніка Сірэне, які штогод прыцягвае як дзяцей, так і дарослых.