У бліжэйшы час у Польшчы можна будзе бясплатна наведаць чатыры замкі і палацы, у якіх калісьці жылі каралі. Традыцыйна напрыканцы восені праходзіць акцыя «Бясплатны лістапад у каралеўскіх рэзідэнцыях».
У рамках мерапрыемства наведвальнікі змогуць убачыць выставы і прыняць удзел у бясплатных адукацыйных падзеях у Каралеўскім замку ў Варшаве, Музеі палаца караля Яна III у Вілянаве, Каралеўскім замку на Вавелі і Каралеўскіх Лазенках. Госці змогуць агледзець экспазіцыі рэзідэнцый, наведаць іх інтэр’еры і прыняць удзел у шматлікіх экскурсіях.
Кожныя выходныя лістапада прысвечаны асобнай рэзідэнцыі – 8–9 лістапада Каралеўскі замак у Варшаве, 15–16 лістапада Музей палаца караля Яна III у Вілянаве, 22–23 лістапада Каралеўскія Лазенкі, а 29–30 лістапада Каралеўскі замак на Вавелі.
У рамках акцыі можна наведаць як пастаянныя, так і часовыя выставы, а таксама прыняць удзел у шматлікіх канферэнцыях, адукацыйных сустрэчах, лекцыях, майстар-класах і музейных уроках.
Падрабязная праграма «Бясплатнага лістапада» даступная на сайце Міністэрства культуры і нацыянальнай спадчыны.