Катовіцы, Познань і Кракаў апынуліся сярод польскіх гарадоў з самым высокім узроўнем камфортнасці жыцця, калі ўлічваць такія фактары, як узровень беспрацоўя, заробкі і кошты нерухомасці. Пра гэта сведчаць даныя Галоўнага статыстычнага ўпраўлення (GUS).
На першы погляд можа падацца, што ў Польшчы няцяжка знайсці працу з добрай аплатай. Аднак рэальнасць больш складаная: сітуацыя на рынку працы моцна залежыць ад рэгіёну, а выдаткі на жыццё — асабліва цэны на жыллё — могуць істотна адрознівацца. Напрыклад, у Чэнстахове за квадратны метр жылля трэба заплаціць каля 6000 злотых, у той час як у сталіцы гэтая сума дасягае ўжо 13 000 злотых.
Каб зразумець, у якім горадзе лепей жыць, варта разгледзець некалькі ключавых паказчыкаў: узровень беспрацоўя, памер заробкаў, а таксама кошты куплі і арэнды жылля. З пятнаццаці прааналізаваных гарадскіх цэнтраў менавіта Катовіцы, Познань і Кракаў паказалі найлепшыя вынікі, абыходзячы, у тым ліку, і Варшаву. Сталіца не заняла першае месца ні ў адной з даследаваных катэгорый, а яе пазіцыі асабліва аслабляюць высокiя суадносіны кошту кватэр да заробкаў.
Пэўную перавагу ў гэтым плане маюць Быдгашч і Чэнстахова, дзе суадносіны заробкаў да цэн на нерухомасць больш прывабныя, хаця абодва гарады сутыкаюцца з даволі высокім беспрацоўем. Падобная сітуацыя назіраецца і ў Гдыні, Шчэціне ды Вроцлаве — яны займаюць пазіцыі побач з Быдгашчам. У той жа час Торунь, Лодзь, Жэшув і Люблін губляюць балы перадусім з-за адносна вялікіх цяжкасцяў з пошукам працы, а найменш прывабным горадам аказаўся Беласток.
Калі казаць пра рынак працы, Познань лідзіруе з самым нізкім узроўнем беспрацоўя — усяго 1%. За ёй ідуць Катовіцы (1,4%), а Варшава з паказчыкам 1,5% займае толькі трэцюю пазіцыю. Наадварот, у Жэшаве, Лодзі і Любліне сітуацыя значна горшая: на сто працаздольных чалавек прыпадае чацвёра беспрацоўных. Найгоршае становішча назіраецца ў Беластоку з 5,5% беспрацоўя.
Адметныя розніцы відаць і ў памерах заробкаў. У сакавіку 2024 года ў Беластоку сярэдні заробак склаў 6100 злотых брута — гэта больш чым на 2000 злотых меней за сярэдні паказчык па краіне. У Лодзі сярэдні заробак набліжаецца да 7100 злотых брута, а ў Любліне перавышае 6800 злотых брута. Найвышэйшыя заробкі прапануе Кракаў (11 372 злотых брута), апярэджваючы Варшаву (10 634 злотых) і Познань (10 731 злотых).
Вызначальным фактарам у канчатковым выніку становяцца суадносіны цэн на жыллё да ўзроўню заробкаў. У Катовіцах за сярэдні месячны заробак можна набыць 1,08 м² жылля, у Чэнстахове — роўна 1 м², а ў Быдгашчы — 0,91 м². Для параўнання, у Варшаве за месячны даход удасца купіць толькі 0,64 м², што робіць сталіцу адным з найменш выгадных гарадоў паводле гэтага паказчыка. Падобная сітуацыя назіраецца ў Беластоку (0,68), Вроцлаве (0,73), Кракаве (0,74), Гдыні (0,74) і Гданьску (0,75).
Такім чынам, хоць Польшча ў цэлым выглядае на еўрапейскім фоне як краіна з адносна нізкім беспрацоўем і растучымі заробкамі, ацэнка прывабнасці жыцця ў асобных гарадах патрабуе дакладнага ўліку ўсіх гэтых фактараў.
На падст. businessinsider.com.pl, money.pl
fot. wikipedia.org